黃絲移民盲舂舂　貨不對辦又想縮

大呻「太空人」辛酸 稱心理壓力巨大

早前英國政府宣布所謂BNO「5+1」入籍政策，一些港人以為藉此方式移民到英國，唔少手持BNO嘅黃絲都以為自己好好彩，個個撲住去申請移民。不過近日就有位自稱「C爸」嘅居英港爸分享做「太空人」嘅辛酸經歷，話移民搞到一家人嘅情緒都出現問題，認真得人驚啊!

「C爸」就話自己上年11月時同太太留低咗小朋友喺香港，兩夫婦先去英國搵樓，初時都無問題嘅，但後來因為太太要返香港處理生意同屋企嘅事，於是「C爸」就接咗小朋友去英國生活。

●劉文杰指有金融才俊到英國後淪為餐館外賣仔。fb專頁「正言自由講」截圖

小朋友想家 家庭拗撬多

「C爸」分享話：「一開頭都OK ?，小朋友好開心，因為屋企又大咗，又有個後園踢波。但係其實只係過咗一星期左右，小朋友就開始掛住香港同『C媽』，而且越嚟越嚴重。有試過食飯時同臨瞓前『發作』，真係喊到收唔到聲。」佢仲話覺得小朋友越嚟越反叛同包拗頸，需要深層心理輔導嘅次數就越嚟越頻密，情況令人擔心，仲形容當時嘅情境「堅恐怖」。

而一個人湊住小朋友嘅「C爸」亦唔好受，因為所有家頭細務都係一個人做晒，然後又要處理小朋友嘅問題，包括home schooling再加陪玩，有時仲要做埋心理輔導，加上時不時同太太有拗撬，搞到大家去到英國嘅心理狀態都越嚟越差。

一個人喺英國兼顧家庭同工作壓力真係唔容易，「C爸」就話好彩自己只係同家人分開兩三個月，如果兩三年嘅話，真係想像唔到會有咩後果!對於有人問佢做「太空人」值唔值得同好唔好，佢就話：「如果長時間，我就絕對有保留，因為心理壓力呢樣嘢，話爆就會爆，陌生環境再加各種壓力，真係唔講得笑。」

移民英國無工開 金融才俊淪外賣仔

近期好多移民去英國嘅黃絲都大呻自己變成失業流民，就算搵到嘢做嘅都只係得啲低下嘅工作。新民黨大埔社區發展主任劉文杰早前就分享咗80後劉姓一家移民去英國嘅故事，話畀大家知去到外國嘅生活唔一定好，仲有機會變得更差!

話說事主劉先生本身喺香港從事金融工作，但佢聲稱基於香港政局變得混亂同教育政治化，所以決定喺上年移民去英國，仲揚言自己係「為下一代而離開」。不過去到英國嘅生活同佢想像中似乎有所出入啦，佢話自己搵咗超過一百份工都無一份成功，最終只能夠去中餐館度送外賣。金融才俊降呢做外賣仔，收入大大減少，人工只得番香港嘅三四成。

劉先生就提醒各位打算去英國嘅黃絲，移民要有充足嘅心理準備，要明白即使放低身段都唔一定搵到嘢做。而即使移民去咗外國，劉先生依然「心繫」香港，話香港係自己嘅屋企，仲時刻提醒女兒係香港人嘅身份。

不過劉文杰就好似對佢嘅說話好反感，仲話希望佢唔好再提自己係香港人，形容佢去外國搵着數就算，唔好降低香港人嘅質素咁話喎。咁又係嘅，黃絲口口聲聲話愛香港但又走佬，乜都俾佢哋講晒啦!

●劉文杰指有金融才俊到英國後淪為餐館外賣仔。fb專頁「正言自由講」截圖

黃絲盲撐移民 中過伏仍害人

個個都話移民，唔通個個都有能力移民咩?不過一向喪失理性嘅黃絲就梗係唔理三七二十一，就算無本事都要跟人一齊移民，最終去到外國一事無成，兩頭唔到岸咁半天吊。而當中最奇怪嘅現象係，黃絲們即使知道實況，但依然會氹「同路人」走咗再算，真係唔知係有心幫人定害人喇。

最近有網民就喺fb專頁「英國香港人生活交流區」投稿，話自己已經四十幾歲，做開物管，自知呢行喺外國都搵唔到啲咩工作，真係唔知可以做咩維生。佢仲問大家：「如果找不到工作，但有百零萬，可以用到6年?」而黃絲最叻嘅就係圍爐取暖，不出一陣「Rick Daiton」就回應佢話：「過左(咗)去適應先，其實係(喺)英國生活唔難，加油!」

唔少黃絲連自己嘅生活都未顧得掂就話要移民，無仔細咁諗過度過就話要走。而對於一班成日掛住移民喺嘴邊嘅黃絲，「Wong Sze」就批評佢哋：「透過2020一整年嘅『康時社混』，咁嘅香港係佢地(哋)一直bless、追求?，種到自己想要嘅果，做咩移民?」同時亦都質疑佢哋：「移民後又搞爛埋其他國家?」

事實上，黃絲們破壞香港後就不斷鼓吹人哋移民，仲經常吹捧外國乜都好，就連月亮都好似特別圓過其他地方咁。可憐唔少蠢黃又真係落疊，唔理自己有無本事同能力，走咗去外國咁就一世，到時後悔都真係無用啦!

● 有黃絲盲目支持港人移英。fb專頁「英國香港人生活交流區」截圖

住台灣都話唔慣 話似養老頂唔順

除咗歐美等地，唔少黃絲都會選擇移居去台灣地區，貪佢物價低之餘又鄰近香港，而且仲有所謂嘅「民主」，可以畀佢哋參與唔同嘅選舉投票。有啲黃絲去過幾次台灣旅行就以為當地生活同香港無乜分別，於是就盲舂舂咁跟住移居去台灣，但去到又發現理想同現實根本係兩回事，最後仲急急腳咁趕返香港。

網民「Yungalice13」日前喺討論區分享，話自己有對夫妻朋友本身都撐黑暴，修例風波後就話留喺香港「無將來、無自由」，於是人走佢哋又走，仲急急腳咁辭咗份設計嘅工作，話要去台灣發展。不過當佢哋去到台灣後搵唔到理想嘅工作，試過去做便利店員工，但又被當地人排外，佢哋仲話當地人都唔鍾意佢哋去爭飯食，而公司又限佢工時唔畀佢返得多，搞到人工勁少。無工返之下兩人唯有走去讀書，但撞正疫情關係無得上堂，兩個人又話台灣生活好悶，好似變成養老咁，結果早兩個月返嚟香港後就話唔想再去。

網民嘲思想似細路哥

呢頭就話「無將來、無自由」而走，轉過頭去了又即刻返嚟香港，睇得出佢哋根本無好好計劃過，難怪網民「JANE1983」都鬧：「移民唔係玩，連根拔起，遠走他鄉，一定係想過度過。兩下後悔又返來，細路哥咩。」「angiehouse」就話：「覺得急于(於)走既(嘅)人系(係)為啖氣。」

另外有網民「1773」都分享咗另一黃絲夫婦移居到台灣嘅故事，佢就話：「我識對yc(黃絲)夫婦，四十(歲)左右，年頭疫情前移居去『民主自由的』台灣，但去到又食唔慣當地的蠔油和月餅，(佢哋)打電話回來，要那位七老八十的媽媽把佢食慣的蠔油和月餅寄去台灣比(畀)佢。」

所以話呢，移民根本唔應該盲從，如果洗濕咗個頭先發現自己根本唔適應當地生活，然後又嫌三嫌四，甚至連當地食物都食唔落，移民後嘅生活真係不見得有變得更高質囉。

●網民分享移台後悔經歷。親子王國討論區截圖

職場文化難頂 黃絲悔赴日居住

眾所周知，日本嘅生活節奏快，而且職場文化相當「獨特」，不過依然有唔少黃絲對當地生活充滿幻想，會選擇移民去日本生活。但一向挑剔多多嘅黃絲，去到日本又點頂得順當地嘅生活壓力吖，有唔少人喺當地生活過後都耍手擰頭，仲話連旅行都唔想再去喎!

「KathyChan_318」日前就喺討論區分享朋友移民去日本嘅故事，話佢相當後悔移咗民去日本，唔習慣當地生活之餘更加頂唔順日本嘅職場文化，所以考慮再移民去其他地方。

連登網民「沁碎小曖」更加列出移民到日本後嘅後悔點，包括交通好唔方便、每日返工二十個鐘、日本排外問題、日本職場好黑暗等，佢更加直言：「(返工)試過連續通宵一個星期都唔畀返屋企，移民日本後發覺生活如地獄，奉獻(勸)大家千其(祈)唔好去日本。」

「babytt2」就回應話：「日本真係麻麻地(哋)，淨係個政府都永遠唔當你(係)自己國民，何況其他人?」曾經喺日本住過嘅「OHIMESAMA」就話：「我係日本住過，如果話香港唔自由嘅人，去到個(嗰)邊一定頂唔住，佢哋嘅群眾壓力令人更加透不過氣，連我(個)女細細個已feel到，話同佢再去日本旅行都say no。」